阿圳伯神位廟（阿狂厝）

在溪湖訂根造夢　91.12.1.a77-1 楊照陽 *（取材自網路）

阿圳伯神位廟（阿狂厝）

先祖族親來台討吃

   楊正發不知影是受著好風聲的影響，還是有其他的理由，一個人就
在1730年前後，對泉州  南安二十四、五都夾水頭鄉，珠山之麓的家
鄉，坐船來瀛島在安平上陸。

　　因為當時南部開發較早，伊就將所帶的銀兩，交換一擔番薯，要往
北部去落地生根，在要   出發進前，伊就先許一個願，就是挑番薯的
扁擔，若是斷在叨位？就是天意要叫伊在叨位落地生湠，伊會照天意去
做，不敢有所忤逆。

   阿發仔對臺灣的地頭生疏，又閣是一塊人溜溜。沿路上，一方面驚
土匪打劫，他方面又驚平埔族原住民來「出草」，所以心肝內，還是比
無上陸以前，還較無安全感。

　　後來正發仔的扁擔，拄好斷在嘉義布袋的樹林頭（里），伊趕緊跪
在地腳，雙手向前、頭 殼叩地，感謝天公伯的指點迷津，伊不敢違誤，
就決心要在這踏定居落來，為了活命，千斤萬斤的重擔，伊也要擔；為
了好的將來，甚麼困難，伊攏嘛不驚。

   經過一段時間的拖磨，伊的打拚去感動平埔番地主，就順便做番駙
馬爺，互番婆招翁婿做 「牽手」。後來有傳後嗣，名字叫做方曹。

　　方曹的個性較堅硬，長大以後，感覺著諸羅山（嘉義）的人較兇惡，
真歹相處。伊不和伊的老爸同款，常常被欺侮，又閣愛強制吞忍（忍耐）
落來。所以伊認為，這踏是無值得久留之地，伊就下定決心要遷徙他方。

　　伊就在1762年，擔一擔竹籠，前面的竹籠擱大漢子「士老」，後面
的竹籠擱小漢子「士德」往北屏的方向行去，一路上感覺前途茫茫，
不知那裏是歸處。

　　沿路上，祇有兩個嬰兒的哭聲作伴。每一次，若是行到一個庄頭，
伊就停落來，問2 個嬰兒：「咱就在這踏，討吃好否？」每一擺，2個
幼嬰仔，攏是用真聲狂的哭聲來回絕，伊家己嘛掠   無主頭，不知影
要如何是好。

　　雖然沿路上，有好幾落擺互伊看著有水源，地理位置也真好的所在。
但是，每次問2個未曉回話的幼嬰仔，伊攏用同款瘋狂的哭聲回絕。

   經過未算齊工的日出月落，互伊行到到處攏是水湳地，以及拋荒的
土地，地名叫湖仔內（今溪湖阿公厝西邊臨地），去遇著真好客（禮）
的「阿圳伯」地主。

　　忽然間，沿路哭哭啼啼不止的2個嬰兒，無閣再哭出聲音，受著無
子嗣的阿圳伯甲意和疼惜，全家被收留，接受幫贊照顧真齊。

　　所以楊方曹特別交待伊的後代子孫，在每年的佳節，攏愛祭祀無子
嗣的阿圳伯。後來在1967年的前後，有將阿圳伯的小土地廟，改建成
有神按桌位，壁肚有書刻「阿圳伯神位廟」，如果包括拜亭和所拜的
廣場約有20坪地，到目前為止。每年還有扮演布袋戲和歌仔戲。